દિલ્હીમાં વાયુ પ્રદૂષણ ઘટાડવા ક્લાઉડ સીડિંગ: કાનપુરથી વિમાન રવાના, બુરાડીમાં કૃત્રિમ વરસાદની તૈયારી
નવી દિલ્હી: દિલ્હીના વધતા વાયુ પ્રદૂષણને નિયંત્રણમાં લાવવા સરકારે કૃત્રિમ વરસાદનો વિકલ્પ અપનાવ્યો છે. આ માટે ક્લાઉડ સીડિંગ ટેક્નોલોજીનો ઉપયોગ કરવામાં આવશે. મંગળવારે સવારે કાનપુરથી ખાસ વિમાન દિલ્હી તરફ રવાના થયું છે, જે બુરાડી વિસ્તારમાં કૃત્રિમ વરસાદ કરાવવાની જવાબદારી સંભાળશે. આ વિમાનમાં સિલ્વર આયોડાઇડ અને સોડિયમ ક્લોરાઇડ જેવા રસાયણોનો ઉપયોગ કરીને વાદળોમાં ભેજ એકઠો કરવામાં આવશે, જેથી વરસાદ પડે અને પ્રદૂષિત કણો ધોવાઈ જાય. ગયા અઠવાડિયે બુરાડીમાં કરાયેલી પરીક્ષણ ઉડાનમાં આ રસાયણો છોડવામાં આવ્યા હતા, પરંતુ વાતાવરણમાં ભેજનું પ્રમાણ 20%થી ઓછું હોવાથી વરસાદ થઈ શક્યો ન હતો. કાનપુરમાં સવારે ઓછી વિઝિબિલિટી (2000 મીટર)ને કારણે વિમાનના ટેક-ઓફમાં વિલંબ થયો હતો. ઉડાન માટે 5000 મીટર વિઝિબિલિટી જરૂરી હોય છે. હવામાન સુધરતાં જ વિમાન દિલ્હી પહોંચ્યું છે. હવે ગમે તે સમયે બુરાડી વિસ્તારમાં મર્યાદિત કૃત્રિમ વરસાદની શક્યતા છે. દિલ્હીમાં AQI સ્તર ખતરનાક સપાટીએ પહોંચી ગયું છે, જેના કારણે આ પગલું લેવામાં આવ્યું છે. નિષ્ણાતોના મતે, આ ટેક્નોલોજી અસરકારક તો છે, પરંતુ તેની સફળતા વાતાવરણીય પરિસ્થિતિઓ પર આધાર રાખે છે.
