અમદાવાદ સેવન્થ ડે સ્કૂલ હત્યા કેસ: આરોપી કિશોરને બાળ સંરક્ષણ ગૃહમાં મોકલાયો, સ્કૂલની બેદરકારી ઉજાગર
અમદાવાદના મણિનગર વિસ્તારમાં આવેલી સેવન્થ ડે સ્કૂલમાં ધોરણ 10ના વિદ્યાર્થી નયન સંતાણીની સાથી વિદ્યાર્થી દ્વારા કટરથી હત્યા કરવામાં આવી હતી. આ ચકચારી ઘટનામાં ખોખરા પોલીસે અટકાયત કરેલા 16 વર્ષીય સગીર આરોપીને 22 ઓગસ્ટ, 2025ના રોજ ખાનપુર ખાતે જુવેનાઈલ જસ્ટિસ બોર્ડ સમક્ષ રજૂ કર્યો હતો. કડક સુરક્ષા વ્યવસ્થા વચ્ચે બોર્ડે આરોપીને 14 દિવસ માટે બાળ સંરક્ષણ ગૃહમાં મોકલવાનો આદેશ આપ્યો, જ્યાં તેનું કાઉન્સેલિંગ થશે. ક્રાઈમ બ્રાન્ચની તપાસમાં સ્કૂલની ગંભીર બેદરકારી સામે આવી છે. સીસીટીવી ફૂટેજમાં ખુલાસો થયો કે ઈજાગ્રસ્ત નયન 38 મિનિટ સુધી સ્કૂલના ઓટલા પર લોહીલુહાણ હાલતમાં પડ્યો રહ્યો, પરંતુ સિક્યુરિટી ગાર્ડ, શિક્ષકો કે અન્ય કોઈએ તેને હોસ્પિટલ પહોંચાડ્યો નહીં. આ બેદરકારીને કારણે નયનનું મોત થયું હોવાનો આરોપ મૃતકના પરિવારે લગાવ્યો છે. ક્રાઈમ બ્રાન્ચે સ્કૂલ સંચાલકો સામે ફરિયાદ નોંધવા કોર્ટમાં અરજી કરી છે, અને જો પુરાવા નાશ કરવાનો પ્રયાસ થયો હશે તો કલમ 201 હેઠળ કાર્યવાહી થશે. આ ઘટનાએ સ્કૂલોમાં વિદ્યાર્થીઓની સુરક્ષાને લઈ ગંભીર સવાલો ઉભા કર્યા છે. મૃતકના પરિવાર અને સિંધી સમાજે આરોપીને કડક સજા અને સ્કૂલની માન્યતા રદ કરવાની માંગ કરી છે.
