-Friday World 🌎 20 માર્ચ 2026
ભાવનગરમાં મિલેટ પ્રત્યે જાગૃતિ ફેલાવવા અને ખેડૂતો તેમજ નાગરિકોને પોષણયુક્ત આહાર તરફ પ્રોત્સાહિત કરવાના ઉદ્દેશ્ય સાથે 21 અને 22 માર્ચ 2026ના રોજ ભવ્ય 'મિલેટ એક્સ્પો'નું આયોજન થઈ રહ્યું છે. જવાહર મેદાન ખાતે યોજાનાર આ બે દિવસીય કાર્યક્રમમાં પ્રાકૃતિક કૃષિ આધારિત અંદાજે 50થી વધુ સ્ટોલ્સ, લાઈવ ફૂડ સ્ટોલ્સ, મિલેટ આધારિત વાનગીઓનું પ્રદર્શન, સાંસ્કૃતિક કાર્યક્રમો અને જાગૃતિ સત્રોનું આયોજન કરવામાં આવ્યું છે. આ એક્સ્પોનું ઉદ્ઘાટન રાજ્યના મંત્રી કૌશિક વેકરિયાના અધ્યક્ષસ્થાને થશે, જે ખેડૂતો અને નાગરિકો માટે મોટું આકર્ષણ બનવાની અપેક્ષા છે.
પરંતુ આ ઉત્સાહ વચ્ચે જ એક મોટો વિવાદ ઉભો થયો છે – આમંત્રણ પત્રિકા! જે કાર્યક્રમ ખેડૂતોના હિત અને કૃષિ જાગૃતિ માટે છે, તેની આમંત્રણ પત્રિકામાંથી રાજ્યના કૃષિમંત્રી જીતુ વાઘાણીનું નામ સંપૂર્ણપણે ગાયબ છે. એટલું જ નહીં, રાજ્યકક્ષાના મંત્રી તેમજ ભાવનગરના સાંસદ નિમુબેન બાંભણીયાનો ફોટો પણ પત્રિકામાંથી અદૃશ્ય છે. આ વાતે રાજકીય વર્તુળોમાં ખળભળાટ મચાવી દીધો છે. લોકો પૂછી રહ્યા છે કે ઘર આંગણે યોજાતા પ્રસંગમાં ઘરના મુખ્ય સભ્યોના નામ અને ફોટા કેમ ભૂલાઈ ગયા?
આમંત્રણ પત્રિકામાં મુખ્ય અતિથિ તરીકે કૌશિક વેકરિયાનું નામ છે. વિશેષ અતિથિ તરીકે નિમુબેન બાંભણીયા, રાજ્યકક્ષાના મંત્રી પરસોત્તમ સોલંકી તથા વિશેષ ઉપસ્થિતિમાં ભાવનગર પૂર્વના ધારાસભ્ય સેજલબેન પંડ્યા, મહુવાના ધારાસભ્ય શિવા ગોહિલ, તળાજાના ધારાસભ્ય ગૌતમ ચૌહાણ, પાલીતાણાના ધારાસભ્ય ભીખા બારૈયા, ગઢડાના ધારાસભ્ય શંભુનાથ ટુંડિયા અને આમ આદમી પાર્ટીના ધારાસભ્ય સુધીર વાઘાણીના નામ પણ સામેલ છે. પરંતુ કૃષિ વિભાગના મુખ્ય મંત્રી જીતુ વાઘાણી અને સ્થાનિક સાંસદ નિમુબેનના નામ-ફોટા ગેરહાજર હોવાથી લોકોમાં આશ્ચર્ય અને ચર્ચા થઈ રહી છે. ખાસ કરીને જ્યારે કાર્યક્રમ કૃષિ અને મિલેટ પ્રમોશનનો છે, ત્યારે કૃષિમંત્રીનું નામ ન હોવું એક મોટી ચૂક જેવું લાગે છે.
આ અંગે મ્યુનિસિપલ કમિશનર આર. કે. મિના સાથે વાત કરતાં તેમણે જણાવ્યું કે, "આ કાર્યક્રમ રાજ્યકક્ષાનો છે અને અમદાવાદમાં મુખ્ય કાર્યક્રમમાં જીતુભાઈ મુખ્ય અતિથિ તરીકે છે. એટલે આ પત્રિકામાં તેમનું નામ નથી લખ્યું. રાજ્યકક્ષાના કાર્યક્રમમાં જોડાવાના છે એટલે લોજિક મુજબ નામ નથી ઉમેર્યું." નિમુબેન બાંભણીયાના ફોટા અંગે પૂછતા તેમણે કહ્યું કે, "આ બધું જિલ્લા પંચાયત કચેરીમાંથી થયું છે, હું તપાસ કરીને જોવડાવી લઉં છું." આ જવાબથી વિવાદમાં નવો વળાંક આવ્યો છે, કારણ કે લોકો માને છે કે સ્થાનિક કાર્યક્રમમાં સ્થાનિક નેતાઓને અવગણવું યોગ્ય નથી.
ઇન્ચાર્જ જિલ્લા ખેતીવાડી અધિકારી મહમદ રિઝવાન ઘાંચીએ જણાવ્યું કે, "આ એક્સ્પોમાં મિલેટ અને પ્રાકૃતિક કૃષિ આધારિત 50થી વધુ સ્ટોલ્સ હશે. નાગરિકો માટે આકર્ષણનું કેન્દ્ર બનશે, જેમાં મિલેટ આધારિત વાનગીઓ, લાઈવ ડેમો, સાંસ્કૃતિક કાર્યક્રમો અને જાગૃતિ સત્રોનો સમાવેશ થશે." મ્યુનિસિપલ કમિશનરે અધિકારીઓને સમયસર કામ પૂર્ણ કરવા અને આયોજનને સુચારૂ બનાવવા માર્ગદર્શન આપ્યું છે.
આ વિવાદ વચ્ચે પણ એક્સ્પોનું મહત્વ અકબંધ છે. મિલેટ્સને 'સુપરફૂડ' તરીકે પ્રોત્સાહન આપવા માટે સરકારી સ્તરે અનેક પહેલો થઈ રહી છે. આ કાર્યક્રમ ભાવનગરના ખેડૂતોને નવી તકો આપશે અને નાગરિકોને આરોગ્યપ્રદ આહાર વિશે જાણકારી આપશે. પરંતુ આમંત્રણ પત્રિકાના આ 'ચૂક'થી રાજકીય ચર્ચાઓ તો ચાલુ જ રહેશે.
આ ઘટના એક વાત સ્પષ્ટ કરે છે કે સ્થાનિક કાર્યક્રમોમાં સ્થાનિક નેતાઓનું મહત્વ કેટલું છે. જો ઘરના પ્રસંગમાં ઘરના સભ્યોને ભૂલી જવાય તો ચર્ચા તો થવાની જ! હવે જોવાનું એ છે કે આ વિવાદ કાર્યક્રમની સફળતાને અસર કરે છે કે નહીં. તેમ છતાં, મિલેટ એક્સ્પો એક સારી શરૂઆત છે – પોષણ, પર્યાવરણ અને ખેડૂતોના ભવિષ્ય માટે.
Sajjadali Nayani ✍
Friday World 🌎 20 માર્ચ 2026
