-Friday World 20 Jun 2026
શ્રદ્ધાનું કેન્દ્ર અચાનક શોકનું ઘર બની ગયું. મહારાષ્ટ્રના પરભણી જિલ્લાના માનવત તાલુકાના યશવાડી ગામે આવેલા પ્રસિદ્ધ મારૂતિ મંદિરમાં શનિવારનો દિવસ કાળ બનીને ત્રાટક્યો. હનુમાનજીના દર્શન અને કીર્તન માટે ઉમટેલા સેંકડો શ્રદ્ધાળુઓ પર સભામંડપની જર્જરિત છત અચાનક કડડભૂસ થઈને તૂટી પડી. આ હૃદયદ્રાવક દુર્ઘટનામાં 6 નિર્દોષ ભક્તોએ જીવ ગુમાવ્યા છે, જ્યારે 25થી વધુ લોકો ગંભીર રીતે ઘાયલ થયા છે. 7c025dec
શું બની ઘટના?
શનિવાર હનુમાનજીનો વાર હોવાથી યશવાડી મારૂતિ મંદિરમાં સવારથી જ ભક્તોની ભારે ભીડ હતી. બપોરના સમયે મંદિરના સભામંડપમાં કીર્તન અને ધાર્મિક કાર્યક્રમ ચાલી રહ્યો હતો. મંડપમાં લગભગ 100થી વધુ શ્રદ્ધાળુઓ બેઠા હતા ત્યારે જ અચાનક સમગ્ર છત ધડાકાભેર નીચે પડી. એક ક્ષણમાં ભજન-કીર્તનના સૂર ચીસોમાં ફેરવાઈ ગયા. નાસભાગ મચી ગઈ અને ધૂળની ડમરીઓથી આખો પરિસર છવાઈ ગયો. આ દ્રશ્યો મંદિરના CCTV કેમેરામાં પણ કેદ થયા છે. 29137c02
કાટમાળ નીચે જીવ માટે જંગ
પ્રાથમિક અંદાજ મુજબ 30 થી 40 લોકો કાટમાળ નીચે દબાયા હતા. ઘટનાની જાણ થતાં જ સ્થાનિક લોકો અને શ્રદ્ધાળુઓએ તાત્કાલિક બચાવ કામગીરી શરૂ કરી દીધી. થોડી જ વારમાં જિલ્લા વહીવટીતંત્ર, પોલીસ અને NDRFની ટીમો ઘટનાસ્થળે પહોંચી ગઈ અને યુદ્ધના ધોરણે કામગીરી શરૂ કરી. અત્યાર સુધીમાં લગભગ 25 લોકોને સુરક્ષિત બહાર કાઢવામાં આવ્યા છે. ઘાયલોને માનવત અને પરભણીની સરકારી હોસ્પિટલમાં ખસેડવામાં આવ્યા છે. 5dec2913
પોલીસ અધિકારીએ જણાવ્યું કે આ ઘટના શનિવારે બપોરે બની હતી. કાટમાળ હટાવવાની કામગીરી હજુ ચાલુ છે અને મૃત્યુઆંક વધવાની ભીતિ સેવાઈ રહી છે. 5dec
વહીવટીતંત્ર એલર્ટ પર
ઘટનાને પગલે સમગ્ર વિસ્તારને કોર્ડન કરી લેવામાં આવ્યો છે. મેઘના બોર્ડીકરે જિલ્લા કલેક્ટર અને પોલીસ અધિક્ષક સાથે સતત સંપર્કમાં રહીને બચાવ કામગીરી પર નજર રાખી છે. અધિકારીઓએ જણાવ્યું કે પરિસ્થિતિ પર સતત નજર રાખવામાં આવી રહી છે અને ટૂંક સમયમાં વિગતવાર માહિતી શેર કરવામાં આવશે. 2913
સવાલોના વર્તુળમાં સભામંડપ
યશવાડી મારૂતિ મંદિર આ વિસ્તારનું જૂનું અને પ્રસિદ્ધ ધામ છે. શનિવારે અહીં મોટી સંખ્યામાં ભાવિકો દર્શન માટે આવે છે. સૂત્રોનું માનીએ તો સભામંડપનું બાંધકામ ઘણું જૂનું હતું. ચોમાસા પહેલા મંદિર પરિસરનું સ્ટ્રક્ચરલ ઓડિટ થયું હતું કે નહીં, તે હવે તપાસનો વિષય બન્યો છે. મંદિરોમાં સભામંડપ, નાટમંડપ જેવા બાંધકામો ભક્તો એકઠા થવા માટે જ હોય છે. પણ જો તેની જાળવણી ન થાય તો શ્રદ્ધાનું સ્થળ જોખમી બની જાય છે. 6a45
સરકાર દ્વારા સહાયની જાહેરાત
મુખ્યમંત્રી કાર્યાલય દ્વારા દુર્ઘટના પર દુઃખ વ્યક્ત કરવામાં આવ્યું છે. પ્રાથમિક માહિતી મુજબ મૃતકોના પરિવારજનોને 5 લાખ અને ગંભીર ઘાયલોને 50 હજારની સહાય આપવાની જાહેરાત થઈ શકે છે. સમગ્ર ઘટનાની ઉચ્ચસ્તરીય તપાસના આદેશ પણ આપવામાં આવ્યા છે.
શ્રદ્ધા અને અંધશ્રદ્ધા વચ્ચેની ભેદરેખા જાળવણી છે. મંદિરો, સભામંડપો માત્ર આસ્થાના નહીં, સુરક્ષાના કેન્દ્રો પણ બનવા જોઈએ. યશવાડીની આ ઘટના તંત્ર અને મંદિર ટ્રસ્ટો માટે લાલબત્તી સમાન છે. કીર્તનના સૂર બંધ થયા, પણ એમ્બ્યુલન્સના સાયરન હજુ ચાલુ છે. જે ભક્તો દર્શન કરવા આવ્યા હતા, તેમના પરિવારજનો હવે હોસ્પિટલના દરવાજે આશા અને પ્રાર્થના સાથે ઉભા છે.
Sajjadali Nayani ✍
Friday World 20 Jun 2026
