- Friday World 29 Aug 2026
સુરત મૂળના પરેશ નટવરલાલ પટેલ અને તેમની પત્ની જ્યોતિબહેન પરેશ પટેલ (બંને અમેરિકા નિવાસી) તથા તેમની દીકરી મીનાક્ષીબહેન રામાણી (મુંબઈ નિવાસી) માનસરોવર યાત્રા દરમિયાન નેપાળ-તિબેટ સરહદ વિસ્તારમાં સંપર્ક વિના થઈ ગયા છે. પરિવારના જણાવ્યા અનુસાર, પરેશભાઈ અને જ્યોતિબહેન 20 ઓગસ્ટે અમેરિકાથી નેપાળ પહોંચ્યા હતા, જ્યારે મીનાક્ષીબહેન 22 ઓગસ્ટે મુંબઈથી જોડાયા હતા. છેલ્લી વાતચીત 23 અથવા 26 ઓગસ્ટે થઈ હતી, જેમાં તેઓએ ઇમિગ્રેશન પ્રક્રિયા પૂર્ણ કરીને તિબેટ તરફ નીકળ્યાની વાત કરી હતી. ત્યારબાદ મોબાઇલ સ્વિચ ઓફ રહે છે અને કોઈ સંપર્ક સ્થાપિત થઈ શક્યો નથી.
આ પરિવાર રસુવાગઢી-કેરુંગ રૂટ પરથી કૈલાશ માનસરોવર યાત્રા કરી રહ્યો હતો. 26 ઓગસ્ટે તિબેટ વિસ્તારમાં ભારે ભૂસ્ખલન અને ભોટેકોશી નદીમાં આવેલા અચાનક પૂરને કારણે કેરુંગ સરહદ, ફ્રેન્ડશિપ બ્રિજ અને આસપાસના રસ્તાઓ ધોવાઈ ગયા છે. ટેલિકોમ્યુનિકેશન નેટવર્ક પણ સંપૂર્ણપણે ઠપ થઈ ગયું છે, જેના કારણે સંપર્ક અશક્ય બન્યો છે.
ઘરમાં વૃદ્ધ માતા સુશીલાબહેન પટેલ અને પરિવારના અન્ય સભ્યો ભારે ચિંતામાં છે. તેમણે સરકાર, ભારતીય દૂતાવાસ અને નેપાળ પ્રશાસનને અપીલ કરી છે કે તેમના પરિવારના ત્રણેય સભ્યોને સુરક્ષિત શોધીને પરત લાવવામાં આવે. ગુજરાત સ્ટેટ ઇમરજન્સી ઓપરેશન સેન્ટર (SEOC) અને વિદેશ મંત્રાલય દ્વારા નેપાળમાં ફસાયેલા પ્રવાસીઓ માટે હેલ્પલાઇન કાર્યરત કરવામાં આવી છે અને હાઈ-એલ્ટિટ્યૂડ રેસ્ક્યૂ કામગીરી ચાલી રહી છે.
આ ઘટના માત્ર એક પરિવારની વ્યથા નથી. નેપાળ-તિબેટ સરહદના આ પૂરમાં અનેક ભારતીય યાત્રીઓ, ખાસ કરીને ગુજરાતના NRI અને સ્થાનિક પરિવારોના સભ્યો સંપર્કવિહીન બન્યા છે. પરિવારો રાહ જોઈ રહ્યા છે કે તેમના પ્રિયજનો સુરક્ષિત પરત ફરે. સરકારી એજન્સીઓ અને સ્થાનિક વહીવટીતંત્ર તલાશી અને બચાવ કામગીરીમાં વ્યસ્ત છે.
આવી કુદરતી આપત્તિમાં માનવીય સહાનુભૂતિ અને સંકલિત પ્રયાસો જરૂરી છે. અસરગ્રસ્ત પરિવારોને શક્તિ મળે અને ગુમ થયેલા તમામ યાત્રીઓ સુરક્ષિત પરત આવે તેવી કામના.
Sajjadali Nayani ✍
Friday World 29 Aug 2026
#NepalFloods
#MansarovarYatra
#SuratFamilyMissing
#KailashPilgrims
#NepalTibetBorder
#MissingPilgrims
#GujaratNRIs
#RescueOperations
#PrayForSafety
#FlashFloods2026
