- Friday World Oct 20,2026
શું છે સમગ્ર મામલો?
વડોદરા મહાનગરપાલિકા દ્વારા ગરીબ અને મધ્યમ વર્ગના લોકો માટે PM આવાસ યોજના હેઠળ હરાજી વગર સીધા મકાન અને દુકાનો ફાળવી આપવાના નામે એક ગેંગ સક્રિય હતી. આ ગેંગ લોકો પાસેથી લાખો રૂપિયા પડાવતી હોવાની ફરિયાદ ગોરવા પોલીસ સ્ટેશનમાં નોંધાઈ હતી.
આ ગુનામાં વડોદરા જિલ્લા ભાજપના કાર્યાલય મંત્રીના પુત્ર કશ્યપ રાકેશભાઈ જોષી (રહે. પ્રથમ રેસિડેન્સી, વાઘોડિયા રોડ) અને તેનો સાગરીત રોહન લક્ષ્મણસિંહ સોલંકી (સંદીપ એસ્ટેટ એજન્સી, સુભાનપુરા) ની ધરપકડ કરવામાં આવી છે. બંને હાલ રિમાન્ડ પર છે.
જીલ બારોટ જ મુખ્ય સૂત્રધાર?
ગોરવા PI કિરિટ લાઠિયાના જણાવ્યા મુજબ, રિમાન્ડ દરમિયાન કશ્યપ જોષીએ તમામ કૌભાંડનો મુખ્ય સૂત્રધાર જીલ બારોટ હોવાનું કબૂલ્યું છે. કશ્યપે પોલીસ સમક્ષ જીલ પર જ દોષ ઢોળી દીધો છે. હાલ પોલીસે જીલ બારોટની ટ્રાન્સફર વોરંટથી ધરપકડ માટે તજવીજ હાથ ધરી છે.
હરણી કનેક્શન: વધુ 36 લાખનું કૌભાંડ
તપાસ દરમિયાન જાણવા મળ્યું કે આ ટોળકીએ માત્ર ગોરવા, સુભાનપુરા અને બાપોદમાં જ નહીં, પરંતુ હરણી વિસ્તારમાં પણ ચાર મકાન અને એક દુકાન ફાળવવાના નામે 36 લાખ રૂપિયા પડાવી લીધા છે. આ અંગે અરજી મળતા હરણી PI એસ.વી. વસાવાએ પણ પુરાવા એકત્ર કરવાનું શરૂ કર્યું છે.
રોફ કેવી રીતે જમાવતા હતા?
આરોપીઓની મોડસ ઓપરેન્ડી ચોંકાવનારી છે. ફરિયાદ મુજબ:
1. કશ્યપ જોષી પોતે કોર્પોરેશનનો અધિકારી અને મામલતદાર હોવાનો રોફ જમાવતો હતો.
2. સુભાનપુરા અને ગોરવામાં તે કોર્પોરેશન અધિકારી તરીકે ઓળખ આપતો હતો.
3. હરણીના કેસમાં જીલ બારોટે રૂપિયાનો વહીવટ સંભાળ્યો હતો, જ્યારે કશ્યપ મામલતદાર કચેરીમાં પોતાને મામલતદાર તરીકે રજૂ કરીને ખોટા દસ્તાવેજો પર સિક્કા મારી આપતો હતો.
હરાજી વગર સીધી ફાળવણીનું લાલચ આપીને ભોળા અરજદારોને વિશ્વાસમાં લેવામાં આવતા હતા. આ કૌભાંડમાં હજુ વધુ લોકો સંડોવાયેલા હોવાની આશંકા પોલીસ વ્યક્ત કરી રહી છે અને તપાસનો વ્યાપ વધારવામાં આવ્યો છે.
આ ઘટનાએ PM આવાસ યોજના જેવી સરકારની મહત્વકાંક્ષી યોજનાની વિશ્વસનીયતા પર સવાલો ઉભા કર્યા છે.
Sajjadali Nayani ✍
Friday World Oct 20,2026
#PMAwasYojanaScam #VadodaraNews #GujaratScam #PMHousingScam #VadodaraCrime #BJP #HarniFraud #GujaratPolice #CorruptionExposed #VadodaraUpdate
