ગત અઠવાડિયે શહેરના ચંડોળા તળાવ અને તેના આસપાસના વિસ્તારોમાં મેગા ડિમોલેશન કરવામાં આવ્યું હતું. આ કાર્યવાહી દરમિયાન ચંડોળા તળાવમાં રહેતા લોકો બેઘર થતાં તેઓ વિસ્થાપન માટે ઘર શોધતા શોધતા શહેરના ગણેશનગર વિસ્તારમાં પહોંચ્યા હતા. પરંતુ ગણેશનગરના સ્થાનિકોએ આ લોકોને ભગાડી દીધા હતા.
ગણેશનગરના સ્થાનિક લોકોમાં ભય છે કે ચંડોળા તળાવથી આવેલા લોકો અહીંયા રહેશે તો તેમના ઝૂંપડા પર તોડી નાખવામાં આવશે.
અમદાવાદના ચંડોળા તળાવમાં રહેતા બાંગ્લાદેશી સહિતના લોકોના ઝુંપડાઓ અને મકાનો મ્યુનિસિપલ કોર્પોરેશન દ્વારા બે મેગા ડિમોલેશન કરીને તોડવામાં આવ્યા હતા. જે લોકોના મકાનો આ ડીમ્યુલેશન દરમિયાન તૂટ્યા છે અને જે લોકો ત્યાંથી વિસ્થાપિત થયા છે તેવા લોકો અમદાવાદ શહેરના પીપળજ રોડ પર આવેલા ગણેશનગરમાં રહેવા આવ્યા હોવાની માહિતી મળી હતી.
સ્થાનિક લોકોએ જણાવ્યું હતું કે, "અમે જાણીએ છીએ છે કે જો ચંડોળાના વિસ્થાપિત લોકો અહીંયા આવી જશે તો અમારા મકાન પણ તૂટી જશે. એટલે અમે કોઈને ઘૂસવા દેતા નથી. અહીંયા જે લોકો રહે છે એ વર્ષોથી સાબરમતીના વિસ્થાપિત લોકો રહે છે. ખોટી ખોટી અફવા ઉડી રહી છે કે ચંડોળાના લોકો અહીંયા ઘૂસી ગયા છે, પરંતુ અહીંયા એક પણ ચંડોળાના લોકો નથી."
