દલિતોના આ મહોલ્લામાં જેની સાથે પણ વાત કરો, પ્રતિબંધ શબ્દ વારંવાર સંભળાશે. વર્ષ 2017માં જ્યારે ઝઘડો થયો ત્યારે ગામમાં દલિતોનો બહિષ્કાર કરી દેવાયો હતો. આ બહિષ્કારને આ લોકો બંદી કહે છે. જોકે સવર્ણ સમુદાયના લોકોનું કહેવું છે કે હવે ગામમાં આવી સ્થિતિ નથી અને દરેક એકબીજાને ત્યાં અવરજવર કરે છે, કોઈના પર કોઈપણ પ્રકારની રોકટોક નથી. બધાના જવાબ અલગ અલગ છે.
ઓમપ્રકાશ ગામના બસ સ્ટેન્ડ પર ફળની રેકડી લગાવે છે. તે કહે છે, પહેલાં આખા ગામના લોકો મારી પાસેથી સામાન ખરીદતા હતા, હવે માત્ર દલિત સમાજ અથવા રસ્તા પર અવજજવર કરતા લોકો જ ખરીદે છે. બીજી જાતિનું કોઈ મારી દુકાન પર આવતું નથી. તે કહે છે, તેની પત્ની કોઈ બીજા ખેતરમાં ચારો કે ઘાસ કાપવા જાય છે તો તેને ગાળો બોલે છે. રસ્તા પર જે ઘાસ હતું તેમાં પણ ઝેરી દવા છાંટવામાં આવી હતી.
ભાટલાના દલિતોનો આરોપ છે કે ઊંચી જાતિના લોકોના દબાણમાં વાળંદ તેમના વાળ પણ નથી કાપતા. વાળંદ સુભાષની ગામમાં બે દુકાન છે. દલિત સમાજના લોકોના વાળ કાપવાની ના પાડવાના આરોપમાં તે સવાત્રણ મહિના જેલની સજા ભોગવીને આવ્યા છે. તેઓ કહે છે કે ત્યારે પ્રતિબંધ હતો તો દબાણમાં ના પાડી દીધી હતી. હવે પસ્તાવો થાય કે ના નહોતી પાડવાની. હવે બધાના વાળા કપાઈ રહ્યા છે. ગામના જ એક કરિયાણાના દુકાનદાર પણ દલિતોનો સામાન વેચવાના આરોપમાં જેલમાં ગયા હતા. હવે તેમની દુકાન પર પણ બધા સામાન ખરીદી રહ્યા છે.
