ઈઝરાયલ અને ઈરાન વચ્ચે ચાલી રહેલા ભયંકર યુદ્ધમાં હવે રશિયા અને અમેરિકા પણ સામેલ થયા છે. ઈઝરાયલ ઈરાનના પરમાણુ સ્થળો અને સૈન્ય સુવિધાઓ પર હુમલા કરી રહ્યું છે, જ્યારે અમેરિકા ઈઝરાયલને સૈન્ય સહાય આપવાની તૈયારી કરી રહ્યું છે. આ સ્થિતિમાં રશિયાએ અમેરિકાને સખત ચેતવણી આપી છે કે, જો તેણે ઈઝરાયલને સૈન્ય મદદ મોકલી તો તેને ‘ગંભીર પરિણામ’ ભોગવવા પડશે.
રશિયન વિદેશ મંત્રાલયના પ્રવક્તા મારિયા જખારોવાએ સમાચાર એજન્સી એએફપીને જણાવ્યું, “અમે અમેરિકાને ઈઝરાયલ-ઈરાન યુદ્ધમાં હસ્તક્ષેપ ન કરવાની ચેતવણી આપીએ છીએ. આ એક અત્યંત ખતરનાક પગલું હશે, જેના અણધાર્યા નકારાત્મક પરિણામો આવશે.” તેમણે એમ પણ કહ્યું કે, ઈઝરાયલના ઈરાનના પરમાણુ ઈન્ફ્રાસ્ટ્રક્ચર પરના હુમલાઓ વિશ્વને વિનાશની નજીક લઈ જઈ રહ્યા છે.
ઈરાને પણ અમેરિકાને ચેતવણી આપી છે કે, તેનો હસ્તક્ષેપ ‘સર્વગ્રાહી યુદ્ધ’નું કારણ બની શકે છે. રશિયા અને ઈરાન વચ્ચેના વ્યૂહાત્મક સંબંધોને ધ્યાનમાં રાખીને, રશિયાનું આ પગલું મહત્ત્વનું માનવામાં આવે છે.
આ ઘટનાક્રમથી મધ્ય પૂર્વમાં તણાવ વધી રહ્યો છે, અને જો અમેરિકા અને રશિયા આ યુદ્ધમાં સીધા સામેલ થશે તો વૈશ્વિક સ્તરે ગંભીર સંકટ ઉભું થઈ શકે છે.
