યુલિયાની નિમણૂકની જાહેરાત
14 જુલાઈ, 2025ના રોજ યોજાયેલી એક બેઠકમાં રાષ્ટ્રપતિ ઝેલેન્સ્કીએ યુલિયા સ્વિરિડેન્કોને વડાપ્રધાન તરીકે નામાંકિત કર્યા. આ બેઠકમાં ઝેલેન્સ્કીએ જણાવ્યું કે, સરકારની કાર્યપાલિકામાં ફેરફારો શરૂ કરવામાં આવ્યા છે, જેની અસર આગામી સમયમાં જોવા મળશે. આ નિર્ણય યુક્રેનની વર્તમાન પરિસ્થિતિને ધ્યાનમાં રાખીને લેવામાં આવ્યો છે, જે રશિયાના હુમલાઓથી બેકફૂટ પર છે.
કોણ છે યુલિયા સ્વિરિડેન્કો?
39 વર્ષીય યુલિયા સ્વિરિડેન્કો ઝેલેન્સ્કીની નજીકની સહયોગી માનવામાં આવે છે. તેમણે 2008માં કિવ યુનિવર્સિટીમાંથી અર્થશાસ્ત્રમાં સ્નાતકની ડિગ્રી મેળવી હતી અને ત્યારબાદ રાજકારણમાં પ્રવેશ કર્યો. યુલિયા યુક્રેનમાં અર્થશાસ્ત્રી તરીકે પણ જાણીતી છે. 2020માં તેઓ રાષ્ટ્રપતિના કાર્યાલય સાથે જોડાયા અને 2021માં ડેપ્યુટી વડાપ્રધાન બન્યા. ખાસ કરીને, યુલિયાએ અમેરિકા સાથે ખનિજ સોદાઓને સફળતાપૂર્વક આગળ ધપાવ્યા હતા, જેના કારણે ઝેલેન્સ્કીનો તેમનામાં વિશ્વાસ વધ્યો.
યુલિયાને વડાપ્રધાન પદ કેમ સોંપાયું?
1. સરકારી ફેરફારોની જરૂર રશિયા સાથેના યુદ્ધને કારણે યુક્રેનની સરકારમાં લાંબા સમયથી ફેરબદલ શક્ય બન્યા નહોતા. ડેનિસ શ્મિહાલને હટાવવા માટે ઝેલેન્સ્કીને યોગ્ય ઉમેદવારની જરૂર હતી. યુલિયા તેમની નજીકની સહયોગી હોવા ઉપરાંત, રાજકીય રીતે સ્વચ્છ છબિ ધરાવે છે, જેના કારણે તેમની પસંદગી કરવામાં આવી.
2. અમેરિકા સાથે સંબંધો સુધારવાની જરૂર
યુક્રેન હાલમાં રશિયાના હુમલાઓથી દબાણમાં છે અને તેને અમેરિકાની તાત્કાલિક સહાયની જરૂર છે. યુલિયાએ અગાઉ અમેરિકા સાથેના ખનિજ સોદાઓમાં મહત્વની ભૂમિકા ભજવી હતી, જેના કારણે તેઓ અમેરિકા સાથે સંબંધો સુધારવા માટે યોગ્ય ઉમેદવાર માનવામાં આવે છે.
યુલિયાની નિમણૂકથી શું બદલાઈ શકે?
યુલિયાને વડાપ્રધાન તરીકે નામાંકિત કરવામાં આવ્યા છે, પરંતુ તેમની નિમણૂકને યુક્રેનની સંસદની મંજૂરી મળવી જરૂરી છે. આ માટે ટૂંક સમયમાં સંસદની બેઠક યોજાઈ શકે છે, જેમાં યુલિયાના નામને ઔપચારિક મંજૂરી આપવામાં આવશે. વડાપ્રધાન બન્યા બાદ યુલિયાનું પ્રથમ લક્ષ્ય અમેરિકા સાથે બગડેલા સંબંધોને સુધારવાનું રહેશે. હાલમાં યુક્રેનનો અમેરિકામાં કોઈ રાજદૂત નથી, અને નવા રાજદૂતની નિમણૂકમાં યુલિયાની ભૂમિકા મહત્વની રહેશે. યુલિયા અમેરિકી રાષ્ટ્રપતિ ડોનાલ્ડ ટ્રમ્પ સાથે વાતચીત કરીને યુક્રેન માટે સૈન્ય અને આર્થિક સહાય મેળવવાનો પ્રયાસ કરશે, જે યુદ્ધની પરિસ્થિતિમાં યુક્રેન માટે નિર્ણાયક સાબિત થઈ શકે છે.
