-Friday World September 20,2026
ટોસ જીતીને ભારતે પ્રથમ બેટિંગ લીધી. બધાની નજર ઓપનિંગ જોડી પર હતી અને શેફાલી વર્માએ શરૂઆતથી જ નક્કી કરી લીધું હતું કે આજે કોઈ દયા નથી.
શેફાલી વર્માનું અવતાર - 49 બોલ, 100 રન નોટઆઉટ
શેફાલી આજે રોકેટની જેમ ઉડી. માત્ર 49 બોલમાં અણનમ 100 રન, 204.08 ની સ્ટ્રાઈક રેટ. ઈનિંગમાં 3 ચોગ્ગા અને 9 ગગનચુંબી છગ્ગા. બાંગ્લાદેશના બોલરો લાઈન-લેન્થ શોધતા રહી ગયા અને બોલ સ્ટેન્ડમાં જતો રહ્યો.
સૌથી શરમજનક વાત બાંગ્લાદેશ માટે એ રહી કે તેમની આખી ટીમ મળીને પણ શેફાલીના એકલાના સ્કોર સુધી ન પહોંચી શકી. શેફાલી 100 અને બાંગ્લાદેશ 81 માં ઓલઆઉટ.
તેની સાથે સ્મૃતિ મંધાનાએ શરૂઆતમાં સુંદર સાથ આપ્યો. બંને વચ્ચે પહેલી વિકેટ માટે 72 રનની ભાગીદારી. સ્મૃતિ 37 રને આઉટ થઈ, પણ પછી કેપ્ટન હરમનપ્રીત કૌર આવી. કેપ્ટને જવાબદારી સાથે આક્રમકતા બતાવી. શેફાલી અને હરમન વચ્ચે 55 બોલમાં 94 રનની મેચ-વિનિંગ ભાગીદારી થઈ. હરમનપ્રીતે 40 રન બનાવ્યા.
અંતે ભારત 20 ઓવરમાં 4 વિકેટે 195 રન, એક પહાડ જેવો સ્કોર.
રેકોર્ડ બુકમાં શેફાલીનું નામ
આ સદી સાથે શેફાલીએ ઈતિહાસ રચ્યો છે. 2026 માં તેના હવે 815 T20I રન થઈ ગયા છે. તે એક કેલેન્ડર વર્ષમાં સૌથી વધુ રન બનાવનાર બીજી ખેલાડી બની ગઈ છે. હાલ લીડ પર સાઉથ આફ્રિકાની લૌરા વોલ્વાર્ટ છે - 824 રન. હવે ફાઈનલમાં શેફાલી પાસે નંબર-1 બનવાનો સુવર્ણ મોકો છે.
બોલરોનો કહેર: 8 બેટર સિંગલ ડિજિટમાં
196 રનનો પીછો કરવા ઉતરેલી બાંગ્લાદેશની ટીમ ભારતીય સ્પિન અને પેસના જાળમાં ફસાઈ ગઈ. હરમનપ્રીતે 5 બોલર વાપર્યા અને પાંચેયને વિકેટ મળી.
દીપ્તિ શર્મા અને નંદિની શર્માએ 3-3 વિકેટ લઈને કમર તોડી નાખી. શ્રી ચરણીને 2 વિકેટ, ક્રાંતિ ગૌડ અને શ્રેયંકા પાટીલને 1-1 વિકેટ મળી. બાંગ્લાદેશના 8 બેટ્સમેન 10 રન પણ ન બનાવી શક્યા. માત્ર ઓપનર દિલારા અખ્તરે 27 રન બનાવ્યા. આખી ટીમ 81 રનમાં પેવેલિયન.
આ જીત ભારતની મહિલા T20I માં રનની દ્રષ્ટિએ ત્રીજી સૌથી મોટી જીત છે, અને બાંગ્લાદેશ સામે અત્યાર સુધીની સૌથી મોટી જીત છે.
આ સાથે ભારતે બાંગ્લાદેશ સામે સતત 10મી T20I જીત મેળવી છે. આ વિજય રથ સપ્ટેમ્બર 2023 થી અટક્યા વગર ચાલે છે.
હવે ફાઈનલ: ભારત vs શ્રીલંકા - 22 સપ્ટેમ્બર
બીજી સેમિફાઈનલમાં શ્રીલંકાએ પાકિસ્તાનને હરાવ્યું છે. હવે 22 સપ્ટેમ્બરે ગોલ્ડ મેડલ માટે ભારત અને શ્રીલંકા વચ્ચે મહામુકાબલો થશે. 2023 માં પણ ભારતે ગોલ્ડ જીત્યું હતું, હવે ટાઈટલ ડિફેન્ડ કરવાનો સમય છે.
શેફાલીના ફોર્મને જોતા લાગે છે કે ગોલ્ડ તો ભારતનું જ છે. પણ ક્રિકેટ અનિશ્ચિતતાની રમત છે. ફાઈનલમાં ચાહકોની નજર ફરી એકવાર શેફાલીના બેટ પર રહેશે.
Sajjadali Nayani ✍
Friday World September 20,2026
#INDvsBAN #AsianGames2026 #ShafaliVerma #TeamIndia #WomenInBlue #HarmanpreetKaur #SmritiMandhana #GoldMedalMatch #WomensCricket #IndiaVsSriLanka
