-Friday World September 20,2026
વડાપ્રધાનના જન્મદિવસની ઉજવણી દેશભરમાં ઉત્સાહથી થઈ રહી છે, ત્યારે ગુજરાતના સરહદી જિલ્લા કચ્છના મુખ્ય મથક ભુજમાંથી એક ચોંકાવનારી અને શરમજનક ઘટના સામે આવી છે. મહિલા અને બાળ વિકાસ વિભાગની આગેવાની હેઠળ યોજાયેલા સ્માર્ટફોન વિતરણ કાર્યક્રમમાં આંગણવાડી બહેનોની સરેઆમ મશ્કરી કરવામાં આવી હોવાનો આક્ષેપ થયો છે.
મળતી માહિતી મુજબ, જિલ્લા પંચાયત હસ્તકની સંકલિત બાળ વિકાસ યોજના (ICDS) વિભાગ દ્વારા કચ્છ જિલ્લાની તમામ આંગણવાડી સંચાલિકા બહેનોને સ્માર્ટફોન આપવાની લાલચ આપવામાં આવી હતી. આ માટે અંતરિયાળ ગામડાઓમાંથી બહેનોને ખાસ ભુજ ખાતે બોલાવવામાં આવી હતી. દૂર-દૂરથી ભાડું ખર્ચીને, પોતાનું કામ છોડીને આશા સાથે આવેલી બહેનોને માત્ર 6 થી 7 પ્રતિકાત્મક ફોન હાથમાં આપીને ફોટોગ્રાફી કરવામાં આવી અને ત્યારબાદ તરત જ એ ફોન પરત લઈ લેવામાં આવ્યા હતા.
શું હતી સમગ્ર ઘટના?
સૂત્રો મુજબ, વડાપ્રધાનના જન્મદિવસ નિમિત્તે સ્માર્ટફોન વિતરણનો કાર્યક્રમ યોજવાનો છે, તેવું કહીને તમામ તાલુકાઓમાંથી આંગણવાડી બહેનોને ભુજ બોલાવવામાં આવી. બહેનોને એવું કહેવામાં આવ્યું હતું કે સરકાર દ્વારા ડિજિટલ ઈન્ડિયાને વેગ આપવા માટે તેમને કામગીરીમાં સરળતા રહે તે માટે સ્માર્ટફોન આપવામાં આવશે.
ઘણી બહેનો 50 થી 100 કિલોમીટર દૂરના નાના રણ, બન્ની, અબડાસા અને લખપત જેવા અંતરિયાળ વિસ્તારોમાંથી સવારથી નીકળીને ભુજ પહોંચી હતી. કાર્યક્રમ સ્થળે હાજરી લેવામાં આવી, થોડીવાર રાહ જોવડાવવામાં આવી અને પછી માત્ર ગણતરીના બહેનોને સ્ટેજ પર બોલાવી ફોન આપતા હોય તેવા દ્રશ્યો ઉભા કરી ફોટા પાડવામાં આવ્યા. કાર્યક્રમ પૂર્ણ થયાના થોડી જ મિનિટોમાં અધિકારીઓએ વિનમ્રતાથી કહ્યું કે, "ફોન હવે પરત આપી દો, આ તો માત્ર પ્રતિકાત્મક વિતરણ હતું."
આ સાંભળીને બહેનો સ્તબ્ધ થઈ ગઈ હતી. ગુસ્સે ભરાયેલી એક બહેને જણાવ્યું હતું કે, "અમને રમકડાં સમજી લીધા છે? જો ફોન આપવા જ નહોતા તો આટલે દૂર શા માટે બોલાવ્યા? અમારા છોકરાઓને ઘરે મૂકીને અમે આવ્યા, આખો દિવસ બગાડ્યો."
તંત્રની બેદરકારી છતી થઈ
આ મામલે જ્યારે જિલ્લા વિકાસ અધિકારી (DDO)નો સંપર્ક કરવામાં આવ્યો ત્યારે તેમણે આ બાબતે પોતાને જાણ જ ન હોય તેવું જણાવ્યું હતું અને આગામી દિવસોમાં કાર્યક્રમનું આયોજન કરાશે તેવું ગોળ-ગોળ જવાબ આપ્યો હતો. આ બાબત ભાજપ શાસિત જિલ્લા પંચાયતની કામગીરી પર અનેક સવાલો ઉભા કરે છે. જે વિભાગ જિલ્લા પંચાયત હેઠળ આવે છે, તેના કાર્યક્રમની જાણ DDOને જ ન હોય તો વહીવટ કેટલો લચર છે તે સ્પષ્ટ થાય છે.
ICDS શાખાના સંકલનના અભાવે કચ્છ જિલ્લાની મહિલાઓમાં ભારે રોષ ભભૂકી ઉઠ્યો છે. એક તરફ સરકાર મહિલા સશક્તિકરણની મોટી મોટી વાતો કરે છે, બીજી તરફ જમીન સ્તરે કામ કરતી, કુપોષણ સામે લડતી, બાળકોને ભણાવતી આંગણવાડી બહેનોને જ આ રીતે હેરાન પરેશાન કરવામાં આવી રહી છે.
આ ઘટના માત્ર ફોનની નથી, પરંતુ વિશ્વાસની છે. ડિજિટલ સેવાઓ માટે સરકારે આંગણવાડી બહેનો પાસે પોષણ ટ્રેકર જેવી એપમાં એન્ટ્રી કરાવવી ફરજિયાત કરી છે, પરંતુ ઘણી બહેનો પાસે હજુ સ્માર્ટફોન જ નથી. તેઓ પોતાના પગારમાંથી ફોન લઈને કામ કરે છે. જો સરકાર ખરેખર ફોન આપવા માંગતી હોય તો પ્રતિકાત્મક નહીં, પણ સાચા અર્થમાં વિતરણ થવું જોઈએ.
સવાલ એ પણ છે કે શું આ કાર્યક્રમ માત્ર ઉપરથી આવેલા ફોટા મોકલવાના દબાણને કારણે ઉતાવળે યોજવામાં આવ્યો હતો? શું વડાપ્રધાનના જન્મદિવસની ઉજવણીનો રિપોર્ટ દિલ્હી મોકલવા માટે કચ્છની ગરીબ મહિલાઓને મહોરા બનાવવામાં આવી?
હાલમાં આંગણવાડી સંગઠનોએ આ મામલે લેખિત રજૂઆત કરવાની તૈયારી બતાવી છે અને માંગ કરી છે કે તમામ બહેનોને તાત્કાલિક સ્માર્ટફોન આપવામાં આવે અને જવાબદાર અધિકારીઓ સામે પગલાં લેવામાં આવે.
Sajjadali Nayani ✍
Friday World September 20,2026
#BhujNews #KutchNews #AnganwadiSisters #SmartphoneDistribution #ICDS #GujaratNews #WomenEmpowerment #DigitalIndia #BhujControversy #AnganwadiWorkers
