-Friday World September 18,2026
ભાવનગર -
ભાવનગર શહેરમાં ગુનાખોરી ડામવા માટે પોલીસ સતત પેટ્રોલિંગ કરી રહી છે, ત્યારે નવાપરા જેવા ભરચક વિસ્તારમાં એક શખ્સ ખુલ્લેઆમ લોડેડ પિસ્ટલ લઈને ફરતો હોવાની ઘટનાએ ચકચાર મચાવી દીધી છે. ભાવનગર સ્પેશિયલ ઓપરેશન ગ્રુપ (SOG) ને મળેલી ચોક્કસ બાતમીના આધારે ટીમે ત્વરિત કાર્યવાહી કરીને એક શખ્સને દેશી બનાવટની પિસ્ટલ અને 6 જીવતા કારતૂસ સાથે ઝડપી પાડ્યો છે.
પ્રાપ્ત વિગતો મુજબ, શહેરના નવાપરા વિસ્તાર, ઈદગાહ મસ્જિદ સામે આવેલી ઈન્ડિયા મોટર્સ નામની દુકાન ચલાવતો જાહિદ હુસેનભાઈ મકવાણા (રહે. ફ્લેટ નં. B/214, મહેક એપાર્ટમેન્ટ, નવાપરા, ભાવનગર) ગેરકાયદેસર હથિયાર સાથે જાહેરમાં ફરી રહ્યો છે, એવી બાતમી SOGના સ્ટાફને મળી હતી.
બાતમીના આધારે SOGના PI અને તેમની ટીમે તાત્કાલિક વોચ ગોઠવી અને નવાપરા વિસ્તારમાં દરોડો પાડ્યો હતો. પોલીસને જોતા જ આ શખ્સ ગભરાઈ ગયો હતો. તેની અંગઝડતી લેતા તેની પાસેથી એક દેશી બનાવટની પિસ્ટલ મળી આવી હતી, જે લોડેડ હાલતમાં હતી. સાથે 6 જીવતા કારતૂસ પણ કબજે કરવામાં આવ્યા હતા.
8 વર્ષ જૂનો ખરીદ-વેચાણનો ભેદ ખુલ્યો
પોલીસે જાહિદ મકવાણાની સઘન પૂછપરછ કરતા ચોંકાવનારો ખુલાસો થયો હતો. પકડાયેલા આરોપીએ કબૂલ્યું હતું કે આ હથિયાર તેણે આજકાલ નથી ખરીદ્યું, પરંતુ આશરે આઠ વર્ષ પહેલા નવાપરામાં જ ગરાસિયા બોર્ડિંગની સામે રહેતા ઈર્શાદ રફિકભાઈ શેખ પાસેથી ખરીદ્યું હતું. આટલા વર્ષોથી તે આ ગેરકાયદેસર હથિયાર પોતાની પાસે છુપાવીને રાખતો હતો અને હવે જાહેરમાં લઈને ફરી રહ્યો હતો.
આ કબૂલાતના આધારે SOGની ટીમે મૂળ હથિયાર સપ્લાય કરનાર ઈર્શાદ શેખને પણ આ ગુનામાં સહ-આરોપી બનાવ્યો છે.
બંને સામે કડક કલમો હેઠળ ગુનો
આ સમગ્ર કાર્યવાહી બાદ SOGએ બંને શખ્સો વિરુદ્ધ નિલમબાગ પોલીસ સ્ટેશનમાં ફરિયાદ નોંધાવી છે. પોલીસે આર્મ્સ એક્ટની કલમ 25 (1-B) (A), 29 તેમજ જી.પી. એક્ટની કલમ 135 હેઠળ ગુનો દાખલ કરી આગળની તપાસ હાથ ધરી છે.
પોલીસ હવે એ દિશામાં તપાસ કરી રહી છે કે આ દેશી પિસ્ટલ ક્યાંથી બનીને આવી? શું આ કોઈ મોટા નેટવર્કનો ભાગ છે? આ હથિયાર રાખવા પાછળનો ઈરાદો શું હતો? શું તેનો ઉપયોગ કોઈ ગુનામાં કરવાનો હતો કે માત્ર દાદાગીરી માટે રાખ્યું હતું?
SOGની કામગીરીને બિરદાવવામાં આવી
ભરચક વિસ્તારમાં લોડેડ હથિયાર સાથે ફરવું એ ખૂબ જ ગંભીર બાબત છે. જો સમયસર પોલીસે કાર્યવાહી ન કરી હોત તો કોઈ મોટી અનિચ્છનીય ઘટના બની શકત હતી. SOGની આ સમયસૂચકતા અને સફળ રેઈડને કારણે એક સંભવિત ગુનો અટકી ગયો છે. હાલ બંને આરોપીઓની ધરપકડની કાર્યવાહી ચાલી રહી છે અને પિસ્ટલને FSL તપાસ માટે મોકલવામાં આવશે.
આ ઘટનાએ ફરી એકવાર સ્પષ્ટ કર્યું છે કે ભાવનગર પોલીસ ગેરકાયદેસર હથિયારો રાખનારા તત્વો સામે કડક હાથે કામ લઈ રહી છે.
Sajjadali Nayani ✍
Friday World September 18,2026
#BhavnagarNews
#BhavnagarSOG
#Navapara
#IllegalPistolSeized
#GujaratPolice
#ArmsAct
#CrimeNewsGujarat
#BhavnagarCrime
#DesiPistol
#GujaratNews
