શું છે સમગ્ર મામલો?
ગુજરાતના ગૃહ વિભાગ હેઠળ કાર્યરત સાયબર સેલ લોકોની સાયબર ફ્રોડની ફરિયાદોનું ઝડપથી નિરાકરણ લાવવા માટે કામ કરે છે. પરંતુ નર્મદા જિલ્લાના સાયબર સેલમાં જ ફરજ બજાવતા પોલીસ કોન્સ્ટેબલ લક્ષ્મણ ચૌધરીએ કરોડો રૂપિયાનું સાયબર ફ્રોડ આચર્યું હોવાનું સામે આવ્યું છે. રાજપીપળા પોલીસ વિભાગના સૂત્રો અનુસાર, છેલ્લા એક વર્ષથી લક્ષ્મણ ચૌધરી સરકારી ઇ-મેલ આઈડીનો દુરુપયોગ કરીને, અન્ય પોલીસ અધિકારીઓની જાણ બહાર, મનસ્વી રીતે માલેતુજાર ગણાતા લોકોના બેંક ખાતાઓ બંધ કરાવવા માટે બેંકોને ઇ-મેલ મોકલતો હતો. બેંકો આ સરકારી મેલના આધારે ખાતાઓ બંધ કરી દેતી હતી.
જેમના બેંક ખાતાઓ બંધ થતાં, તેઓ ફરિયાદ લઈને રાજપીપળા સાયબર સેલમાં આવતા. આવા ફરિયાદીઓ પાસેથી લક્ષ્મણ ચૌધરી રૂપિયાની માંગણી કરીને ખાતાઓ ફરીથી ચાલુ કરાવવાની ખોટી ખાતરી આપતો હતો. આ ગેરરીતિની જાણ નર્મદા જિલ્લા પોલીસ વડા પ્રશાંત શુંબેને થતાં, તેમણે આ મામલાની તપાસ એએસપી લોકેશ યાદવને સોંપી. ત્રણ મહિનાની વિગતવાર તપાસ બાદ એએસપીએ ચૌધરીની સાયબર ફ્રોડની પ્રવૃત્તિઓનો અહેવાલ જિલ્લા પોલીસ વડાને સોંપ્યો.
કાયદેસર કાર્યવાહી અને તપાસ
નર્મદા જિલ્લા પોલીસ વડાએ આ મામલે રેન્જ આઈજી, ડીજીપી અને ગૃહ વિભાગને જાણ કરી. તેમની સૂચના મુજબ લક્ષ્મણ ચૌધરી વિરુદ્ધ રાજપીપળા પોલીસ મથકમાં સાયબર ફ્રોડનો ગુનો નોંધવામાં આવ્યો છે. નર્મદા પોલીસે ચૌધરીને સસ્પેન્ડ કરી દીધો છે, અને આ મામલે વધુ તપાસ નર્મદા એસઓજી (સ્પેશિયલ ઓપરેશન્સ ગ્રૂપ) દ્વારા હાથ ધરવામાં આવી છે.
રાજપીપળા ટાઉન પોલીસ ઇન્સ્પેક્ટર વી.કે. ગઢવીએ જણાવ્યું, "લક્ષ્મણ ચૌધરીએ કેટલા રૂપિયાનું સાયબર ફ્રોડ કર્યું તે હજુ સ્પષ્ટ થયું નથી. પરંતુ તેની સામે ગુનો નોંધાયો છે, અને આ ગંભીર મામલે નર્મદા પોલીસે તપાસ શરૂ કરી છે."
આ ઘટનાએ સાયબર સેલની કામગીરી અને પોલીસ વિભાગની વિશ્વસનીયતા પર સવાલો ઉભા કર્યા છે. નર્મદા પોલીસ હવે આ કેસમાં સામેલ અન્ય સંભવિત આરોપીઓ અને ફ્રોડની રકમની વિગતો શોધવા માટે ઊંડાણપૂર્વકની તપાસ કરી રહી છે.
