પેન્ટાગોને મધ્ય-પૂર્વમાં વધારાના ફાઈટર જેટ્સ, એરિયલ રિફ્યુઅલિંગ ટેન્કર્સ અને યુદ્ધ જહાજો તૈનાત કર્યા છે, જે વ્યૂહાત્મક સ્થળોએ ગોઠવાયા છે. આ પગલાં વ્યાપક યુદ્ધની તૈયારીઓનો સંકેત આપે છે. પ્રમુખ ડોનાલ્ડ ટ્રમ્પે દાવો કર્યો છે કે, “અમે ઈરાનના આકાશ પર સંપૂર્ણ નિયંત્રણ મેળવી લીધું છે.” આ નિવેદનથી વૈશ્વિક સ્તરે ચર્ચા શરૂ થઈ છે કે અમેરિકા ઈરાનના પરમાણુ સંકુલો પર હુમલો કરવાની યોજના બનાવી રહ્યું છે. જોકે, અમેરિકી સૈન્યએ સ્પષ્ટતા કરી છે કે હજુ સુધી કોઈ અમેરિકી વિમાન ઈરાનની હવાઈ સીમામાં પ્રવેશ્યું નથી.
અમેરિકાએ કેટલા F-16 વિમાનો મોકલ્યા તેનો ચોક્કસ આંકડો જાહેર નથી થયો, પરંતુ ડઝનબંધ F-16 સાઉદી અરબ પહોંચી ગયા છે, જે આસપાસના આકાશમાં રક્ષણાત્મક ગશ્ત કરી રહ્યા છે. ડીગો ગાર્સિયા ટાપુ પર B-52 બોમ્બર્સને અનામત તરીકે રાખવામાં આવ્યા છે. આ ઉપરાંત, 30,000 પાઉન્ડના GBU-57 બંકર-બસ્ટર બોમ્બથી સજ્જ B-2 સ્ટીલ્થ બોમ્બર્સની તૈનાતી હજુ થઈ નથી, પરંતુ જરૂર પડે તે ગોઠવાશે. આ બોમ્બ ઈરાનના ફોર્ડો પરમાણુ સંકુલ જેવી પર્વતોમાં બનાવેલી ગુફાઓને નષ્ટ કરવામાં સક્ષમ માનવામાં આવે છે.
જાસૂસી સંસ્થા ઓરોરાના અહેવાલ મુજબ, અમેરિકાએ ફાઈટર જેટ્સના રિફ્યુઅલિંગ માટે યુકે, સ્પેન અને જર્મનીનો સંપર્ક સાધ્યો છે. અમેરિકાનું જાસૂસી જહાજ આર્લે-બર્ક ઈરાની મિસાઈલોને અટકાવવામાં સક્ષમ છે. આ ઉપરાંત, વિશાળ વિમાનવાહક જહાજો USS નિમિત્ઝ અને USS ગેરાલ્ડ આર. ફોર્ડ, તેમજ ડિસ્ટ્રોયર્સ અને ફ્રિગેટ્સ અરેબિયન સમુદ્રમાં પહોંચી ગયા છે. અમેરિકા 40,000 સૈનિકો પણ આ વિસ્તારમાં મોકલી રહ્યું છે.
નિષ્ણાતોનું માનવું છે કે, અમેરિકાના આ આક્રમક પગલાંથી તેલના વેપાર પર નિર્ભર મધ્ય-પૂર્વમાં વ્યાપક યુદ્ધ ભડકી શકે છે. ઈરાને પણ ચેતવણી આપી છે કે કોઈપણ હુમલાનો જવાબ તે હાઈપરસોનિક મિસાઈલો વડે આપશે, જેને અટકાવવું મુશ્કેલ છે. આ સ્થિતિ વૈશ્વિક અર્થતંત્ર અને શાંતિ માટે ગંભીર ખતરો ઊભો કરી શકે છે.
