અમદાવાદ, 17 એપ્રિલ 2026: ચૂંટણીનો તાપ વધી રહ્યો છે ત્યારે નેતાઓ મત માંગવા લોકોના ઘરે પહોંચી રહ્યા છે. પરંતુ આ વખતે જનતા ખાલી વચનો અને આશ્વાસનોથી સંતુષ્ટ નથી. અમદાવાદના અસારવા અને વાસણા વિસ્તારમાં ભાજપના ઉમેદવારો અને પૂર્વ કોર્પોરેટરોને સ્થાનિક લોકોએ ખુલ્લા આક્રોશ સાથે વિરોધ કરીને પાછા વાળી દીધા છે.
આ બંને વિસ્તારોમાં થયેલી ઘટનાઓના વીડિયો સોશિયલ મીડિયા પર વાયરલ થઈ રહ્યા છે. લોકો સ્પષ્ટ સંદેશ આપી રહ્યા છે કે “કામ નથી કર્યું તો વોટ પણ નહીં મળે.”
અસારવામાં ગુસ્સો ફાટી નીકળ્યો
અસારવા વોર્ડની ઓમનગર અને કિસ્મત સોસાયટીમાં ભાજપની પ્રચાર ટીમ પહોંચી ત્યારે સ્થાનિક રહીશોનો ગુસ્સો વિસ્ફોટ થયો. છેલ્લા છ મહિનાથી સોસાયટીમાં ગટરનું ગંદું પાણી ભરાઈ રહ્યું છે. આ સમસ્યાને કારણે બાળકો ઝાડા-ઉલટીથી પીડાઈ રહ્યા છે અને બોર્ડની પરીક્ષાઓ ચાલતી હોવા છતાં કોઈ જવાબદાર અધિકારી કે નેતા મદદ કરવા આવ્યો નથી.
લોકોએ નેતાઓને સોસાયટીમાં ઘૂસવા જ ન દીધા. એક મહિલાએ કહ્યું, “જ્યારે અમારા બાળકો બીમાર હતા ત્યારે તમે ક્યાં હતા? આજે વોટ માંગવા આવ્યા છો?” પૂર્વ કોર્પોરેટર અનુબેન પટેલે અગાઉ ફોન પર “તમારા વોટની જરૂર નથી” જેવું વલણ દર્શાવ્યું હતું, જેનો આજે લોકોએ જોરદાર વિરોધ કર્યો.
લોકોએ “ભાજપ ભગાવો”ના નારા લગાવ્યા. ભાજપ કાર્યકર્તાઓએ “ભારત માતા કી જય”ના નારા લગાવીને પરિસ્થિતિ સંભાળવાનો પ્રયાસ કર્યો, પરંતુ લોકોની વેદના આગળ તેમનું કોઈ જોર ન ચાલ્યું. છેવટે પ્રચાર ટીમને પાછી વળવી પડી.
વાસણામાં નેતાને અરીસો બતાવ્યો
વાસણા વિસ્તારમાં ભાજપના ઉમેદવાર મેહુલ શાહ જ્યારે પ્રચાર માટે પહોંચ્યા ત્યારે સ્થાનિકોએ તેમને ઘેરી લીધા. વર્ષોથી ડ્રેનેજ અને પાણીની સમસ્યા સાથે જીવતા લોકોએ પૂછ્યું, “આટલા વર્ષોથી તમે ક્યાં હતા?”
નેતાએ જવાબ આપવાને બદલે લોકોને “ધીરે બોલ, મને સંભળાય છે, શાંતિથી વાત કર” કહીને શાંત પાડવાનો પ્રયાસ કર્યો. આ વલણ જોઈને લોકો વધુ ગુસ્સે થયા. જ્યારે લોકોએ વીડિયો ઉતારવાનું શરૂ કર્યું ત્યારે નેતાએ “વીડિયો ન ઉતારીશ” કહીને બચાવ કરવાનો પ્રયાસ કર્યો, જે વધુ વિવાદાસ્પદ બન્યો.
લોકોએ કહ્યું, “અમે વર્ષોથી તમારી વાત સાંભળીએ છીએ, આજે તમે અમારી વાત સાંભળો.” આ ઘટનાનો વીડિયો પણ સોશિયલ મીડિયા પર ઝડપથી વાયરલ થઈ રહ્યો છે।
જનતાનો સ્પષ્ટ સંદેશ
આ બંને ઘટનાઓ સ્પષ્ટ રીતે દર્શાવે છે કે જનતા હવે ખાલી વચનોથી ખુશ થવા તૈયાર નથી. અમદાવાદના આ વિસ્તારોમાં મૂળભૂત સુવિધાઓ જેમ કે ગટર, પાણી, સ્વચ્છતા અને રસ્તાઓની સમસ્યા વર્ષોથી અધૂરી પડી છે. લોકો કહે છે કે જ્યારે તેઓ તકલીફમાં હતા ત્યારે કોઈ નેતા તેમની પાસે આવ્યો ન હતો.
સોશિયલ મીડિયાના યુગમાં એક વીડિયો હજારો લોકો સુધી પહોંચી જાય છે અને નેતાઓના વલણને ખુલ્લું કરી દે છે. આ ઘટનાઓ અન્ય વિસ્તારોમાં પણ જાગૃતિ વધારી રહી છે.
રાજકીય મહત્વ
વિરોધી પક્ષોએ આ ઘટનાઓને ભાજપ માટે મોટો ઝટકો ગણાવ્યો છે. તેઓ કહે છે કે જનતા હવે જાગૃત થઈ ગઈ છે અને વિકાસના નામે ખાલી વાતો સ્વીકારવા તૈયાર નથી.
આ ઘટનાઓ એક મોટો પાઠ છે કે ચૂંટણીમાં નેતાઓને યાદ રાખવું જોઈએ કે જનતા તેમની સેવક છે, ગુલામ નથી. જો મૂળભૂત સુવિધાઓ પૂરી પાડવામાં નિષ્ફળતા મળે તો જનતા પણ પોતાનો અધિકાર જાહેર કરવામાં પાછી પડતી નથી.
લોકશાહીમાં જનતા જ સર્વોપરી છે. અમદાવાદના અસારવા અને વાસણાના લોકોએ આ સત્યને ફરી એક વાર યાદ અપાવ્યું છે.
Sajjadali Nayani ✍
Friday World-April 17,2026
