નોહરમાં લોકશાહીનો અજબ ખેલ: 20 બેઠક જીતીને પણ કોંગ્રેસ સત્તાથી દૂર, ચિઠ્ઠીએ ભાજપને બનાવ્યો બાદશાહ!

- Friday World September 23,2026

રાજસ્થાનના હનુમાનગઢ જિલ્લાના નોહરમાં જે થયું છે, તે રાજકીય શાસ્ત્રના તમામ પુસ્તકોને ફેલ કરી દે તેવું છે. 14 સપ્ટેમ્બરના રોજ આવેલા નગરપાલિકા ચૂંટણીના પરિણામમાં કોંગ્રેસે 40 માંથી 20 વોર્ડ જીતીને અડધું મેદાન કબજે કરી લીધું હતું. ભાજપના ખાતામાં તો માંડ 2 બેઠકો આવી હતી, જ્યારે 18 બેઠકો પર અપક્ષો જીત્યા હતા. ગણિત સ્પષ્ટ કહેતું હતું - અધ્યક્ષ કોંગ્રેસનો જ બનશે. પણ રાજકારણ ગણિતથી નહીં, ગણતરીથી ચાલે છે, અને નોહરમાં આ વાત સાબિત થઈ ગઈ.

7 દિવસની પડદા પાછળની રમત અને 20-20 ની ટાઈ

ચૂંટણી પરિણામ પછી 7 દિવસ સુધી નોહરમાં જે થયું તે સામાન્ય નહોતું. ભાજપે હાર માનવાને બદલે અપક્ષો પર નજર નાખી. ભાજપની નજર 62 વર્ષીય હાજન ખાતુન તક પર પડી, જેઓ અપક્ષ તરીકે ચૂંટણી જીત્યા હતા. ભાજપે તરત જ તેમને સમર્થન જાહેર કરીને અધ્યક્ષ પદના ઉમેદવાર બનાવી દીધા.

સોમવારે જ્યારે અધ્યક્ષની ચૂંટણી માટે મતદાન થયું, ત્યારે આખું ગણિત ઉલટું પડી ગયું. ભાજપના 2 કોર્પોરેટર + 18 અપક્ષો = 20 મત, હાજન ખાતુન તકને મળ્યા. સામે કોંગ્રેસના ઉમેદવાર સુમિત ચાચનને પણ તેના 20 કોર્પોરેટરોના 20 મત મળ્યા. સદનમાં 20-20 ની બરાબરી સર્જાઈ.

ચિઠ્ઠી ઉપાડી બાળકીએ અને નસીબ ખુલ્યું ભાજપનું

નગરપાલિકા અધિનિયમ મુજબ બરાબરીની સ્થિતિમાં ફરી મતદાન થતું નથી, વિજેતાનો ફેંસલો લોટરી એટલે કે ચિઠ્ઠી ઉપાડીને થાય છે. અધિકારીઓએ બે ચિઠ્ઠીઓ બનાવી એક બોક્સમાં નાખી. એક નાની બાળકીને બોલાવવામાં આવી. બાળકીએ એક ચિઠ્ઠી ઉપાડી અને ખોલતા જ નામ નીકળ્યું - હાજન ખાતુન તક.

આ સાથે જ માત્ર 2 બેઠક ધરાવતી ભાજપનો ઝંડો નોહર નગરપાલિકા પર લહેરાઈ ગયો, અને 20 બેઠક જીતનારી કોંગ્રેસ જોતી રહી ગઈ. આને કહેવાય ખરો રાજકીય ખેલ.

કોણ છે હાજન ખાતુન તક?

હાજન ખાતુન તક કોઈ નવું નામ નથી. તેમનો પરિવાર નોહરના રાજકારણમાં વર્ષોથી સક્રિય છે. તેમના દિવંગત પતિ મંજૂર અલી તક પણ નોહર નગરપાલિકાના અધ્યક્ષ રહી ચૂક્યા છે. વધુ રસપ્રદ વાત એ છે કે તેઓ રાજસ્થાન સરકારના પૂર્વ રાજ્ય મંત્રી મેહરુનિસ્સા તકના સાસુ છે. એટલે કે અનુભવ અને વારસો બંને તેમની સાથે છે.

ભાજપે એક મુસ્લિમ મહિલાને અધ્યક્ષ બનાવીને માત્ર નોહરમાં જ નહીં, પણ સમગ્ર રાજસ્થાનમાં એક મોટો સંદેશ આપવાનો પ્રયત્ન કર્યો છે કે પાર્ટી સર્વ સમાજને સાથે લઈને ચાલે છે.

ચૂંટણી પહેલા પોલીસની નોટિસથી ગરમાયું હતું રાજકારણ

આ આખા ઘટનાક્રમમાં એક વધુ ટ્વિસ્ટ છે. અધ્યક્ષની ચૂંટણીના બરાબર એક દિવસ પહેલા કોંગ્રેસના ધારાસભ્ય અમિત ચાચનના નજીકના લોકોના ઘરો પર પોલીસે જમીન કૌભાંડ મામલે નોટિસો ચોંટાડી હતી. કોંગ્રેસે આને ભાજપનું દબાણનું રાજકારણ ગણાવ્યું હતું, જ્યારે ભાજપે તેને કાયદાકીય પ્રક્રિયા ગણાવી હતી. આ કાર્યવાહી પછી અપક્ષોનું વલણ બદલાયું હોવાની ચર્ચા પણ શહેરમાં જોરશોરથી ચાલી રહી છે.

આ જીત બતાવે છે કે ભારતીય લોકશાહીમાં આંકડા મહત્વના છે, પણ આખરી જીત તો જોડતોડ, વ્યૂહરચના અને ક્યારેક નસીબની ચિઠ્ઠીથી જ નક્કી થાય છે. નોહરની જનતાએ કોંગ્રેસને સૌથી મોટો પક્ષ બનાવ્યો, પણ ખુરશી ભાજપ લઈ ગયું.

Sajjadali Nayani ✍

Friday World September 23,2026

#NoharMunicipality #RajasthanPolitics #BJPvsCongress #MunicipalElection2025 #PoliticalTwist #HajanKhatunTak #LotterySystem #CongressShock #BJPStrategy #RajasthanNews