યુક્રેનની વાયુસેનાએ જણાવ્યું કે, તેમની હવાઈ સંરક્ષણ પ્રણાલીએ કેટલાક ડ્રોન અને મિસાઈલોને હવામાં જ નષ્ટ કરી દીધી. જોકે, લગભગ 200 ડ્રોન અને અનેક મિસાઈલ પાંચ અલગ-અલગ સ્થળોએ પડવાથી નુકસાન થયું. ચેર્નિવત્સી શહેરમાં ઓછામાં ઓછા બે લોકોના મોત અને 14 લોકો ઘાયલ થયા. નુકસાનની સચોટ વિગતો હજુ સ્પષ્ટ થઈ નથી, પરંતુ આ હુમલાએ યુક્રેનના રહેણાંક અને ઈન્ફ્રાસ્ટ્રક્ચરને નોંધપાત્ર અસર કરી.
ઝેલેન્સ્કીએ આ હુમલાને "આતંકવાદી માનસિકતા"નું પ્રતીક ગણાવીને વિશ્વના નેતાઓને અપીલ કરી કે, રશિયા પર વધુ કડક પ્રતિબંધો લાદવામાં આવે. તેમણે ખાસ કરીને રશિયાને ડ્રોન બનાવવામાં મદદ કરનારા દેશો અને તેમના તેલની નિકાસ દ્વારા નફો કરાવનારા લોકો સામે કાર્યવાહીની માગ કરી. તેમણે જણાવ્યું કે, રશિયાનું અર્થતંત્ર તેલ નિકાસ પર નિર્ભર છે, જે આ યુદ્ધને ટેકો આપે છે. ઝેલેન્સ્કીએ ભારપૂર્વક કહ્યું, "આ યુદ્ધને ફક્ત શક્તિથી જ રોકી શકાય છે."
આ હુમલાએ યુક્રેન-રશિયા યુદ્ધની તીવ્રતા અને તેના વૈશ્વિક પરિણામોને ફરી એકવાર ઉજાગર કર્યા છે. ઝેલેન્સ્કીએ પશ્ચિમી દેશોને તાત્કાલિક અને નિર્ણાયક પગલાં લેવા હાકલ કરી, જેથી આવા હુમલાઓ રોકી શકાય. યુક્રેનની વાયુસેનાએ પણ એર ડિફેન્સ સિસ્ટમ અને ઈન્ટરસેપ્ટર ડ્રોનના ઉત્પાદનમાં વધારો કરવાની જરૂરિયાત પર ભાર મૂક્યો છે.
આ ઘટના રશિયા-યુક્રેન યુદ્ધના ત્રણ વર્ષથી વધુ સમયના ઇતિહાસમાં સૌથી મોટો હવાઈ હુમલો માનવામાં આવે છે, જેના કારણે આંતરરાષ્ટ્રીય સમુદાયમાં ચિંતા વધી છે.
[
