આ ઘટનાને ઓસ્ટ્રેલિયન સત્તાધિશોએ આતંકવાદી હુમલો જાહેર કર્યો છે, જેમાં યહૂદી સમુદાયને ખાસ ટાર્ગેટ કરવામાં આવ્યો હતો. ઘટના સ્થળે અફરાતફરી મચી ગઈ. સેંકડો લોકો ઉજવણીમાં ભાગ લઈ રહ્યા હતા ત્યાં અચાનક ગોળીઓના અવાજો ગુંજી ઉઠ્યા.
પ્રત્યક્ષદર્શીઓએ જણાવ્યું કે લોકો જીવ બચાવવા દોડવા લાગ્યા, જ્યારે ઘાયલો જમીન પર પડી ગયા. બોન્ડી પેવિલિયન નજીક આર્ચર પાર્કમાં "ચાનુક્કા બાય ધ સી" નામના કાર્યક્રમમાં હજારો લોકો એકત્ર થયા હતા, જ્યાં હનુક્કાની પહેલી દીવો પ્રગટાવવાની ઉજવણી ચાલી રહી હતી. ન્યૂ સાઉથ વેલ્સ પોલીસે તાત્કાલિક ઓપરેશન શરૂ કર્યું. એક હુમલાખોર પોલીસની ગોળીબારમાં માર્યો ગયો, જ્યારે બીજાની ધરપકડ કરવામાં આવી છે અને તેની હાલત ગંભીર છે.
પોલીસે વિસ્તારમાંથી લોકોને દૂર રહેવા અપીલ કરી અને સમગ્ર વિસ્તારને સીલ કરી દીધો. ઘટનાસ્થળેથી શંકાસ્પદ વિસ્ફોટક ઉપકરણો પણ મળી આવ્યા છે, જેને બોમ્બ સ્ક્વોડે નિષ્ક્રિય કર્યા.
ઓસ્ટ્રેલિયાના વડાપ્રધાન એન્થોની અલ્બેનીઝે આ ઘટનાને "ભયાનક અને વિચલિત કરી દે તેવી" ગણાવી છે. તેમણે કહ્યું, "હનુક્કાના પહેલા દિવસે યહૂદી ઓસ્ટ્રેલિયનો પર આ હુમલો એ આખા દેશ પર હુમલો છે. આ દુષ્ટ એન્ટિસેમિટિઝમનું કૃત્ય છે." ન્યૂ સાઉથ વેલ્સના પ્રીમિયર ક્રિસ મિન્સે પણ શોક વ્યક્ત કરતાં કહ્યું કે આ દૃશ્યો અત્યંત દુઃખદાયક છે અને પોલીસ તપાસમાં સંપૂર્ણ સહયોગ કરી રહી છે.
આ હુમલાએ વિશ્વભરમાં આક્રોશ ફેલાવ્યો છે. ઇઝરાયલના રાષ્ટ્રપતિ આઇઝેક હર્ઝોગે તેને "ઘાતકી આતંકવાદીઓનું ક્રૂર કૃત્ય" ગણાવ્યું. ઓસ્ટ્રેલિયામાં ગાઝા યુદ્ધ પછી એન્ટિસેમિટિક ઘટનાઓમાં વધારો થયો છે, જેના કારણે યહૂદી સમુદાયમાં ભયનો માહોલ છે. તપાસ ચાલુ છે અને પોલીસ વધુ વિગતો જાહેર કરશે. આ ઘટનાએ ઓસ્ટ્રેલિયાની શાંતિ અને સુરક્ષાને મોટો આંચકો આપ્યો છે.
સજ્જાદ અલી નાયાણી ✍
