- Friday World September 17,2026
શું હતું સમગ્ર કૌભાંડ?
આરોપીઓએ પ્લે સ્ટોર પર એક સામાન્ય પેમેન્ટ એપ જેવી દેખાતી 'SD Pay' એપ મૂકી હતી. શરૂઆતમાં યુઝર્સને નાના-નાના વળતર અને કેશબેક આપીને વિશ્વાસ જીતવામાં આવ્યો. ત્યારબાદ મલ્ટિ-લેવલ માર્કેટિંગ (MLM) મોડલ શરૂ કરાયું.
પોલીસ તપાસ મુજબ, પહેલા લેવલ પર 271 લોકોને પોતાના રેફરલથી જોડવામાં આવ્યા. ત્યારબાદ આ ચેઈન એટલી ઝડપથી વધી કે 10 લાખથી વધુ લોકોએ એપ ડાઉનલોડ કરી અને અંદાજે 1.50 લાખથી 1.75 લાખ લોકો રોકાણની જાળમાં ફસાઈ ગયા. રોકાણ કરો, બીજાને જોડો અને બમણું કમાઓ - આ જ લોભામણી સ્કીમ ₹634 કરોડના મહાકૌભાંડમાં ફેરવાઈ ગઈ.
SIT ની મોટી કાર્યવાહી, ઓડિશાથી ફ્લાઇટમાં લવાયા માસ્ટરમાઈન્ડ
અમરેલી જિલ્લા પોલીસ વડા દ્વારા રચાયેલી સ્પેશિયલ ઈન્વેસ્ટિગેશન ટીમ (SIT) એ આ કેસમાં દિવસ-રાત કામ કર્યું છે. શરૂઆતમાં 6 આરોપીઓની ધરપકડ બાદ પોલીસ મુખ્ય સૂત્રધારો સુધી પહોંચી.
બે દિવસ પહેલા સૌથી મોટી સફળતા મળી. એપના માલિક ધવલ પટેલ અને તેનો સાગરિત હિરેન શાહને ઓડિશામાંથી ટ્રેસ કરીને ઝડપી લેવાયા. બંનેને ફ્લાઇટ મારફતે અમરેલી લાવવામાં આવ્યા. તેમની સઘન પૂછપરછના આધારે ત્રીજા સાથી ભાવેશ અરવિંદ ધનેચાની પણ ધરપકડ કરાઈ છે. આ સાથે કુલ આરોપીઓની સંખ્યા 9 થઈ છે.
પ્રેસ કોન્ફરન્સમાં પોલીસે જણાવ્યું કે NCCRP પોર્ટલ પર આ ગેંગના 18 બેંક ખાતાઓ સામે દેશભરમાંથી 195 જેટલી સાયબર ફ્રોડની ફરિયાદો પહેલેથી જ નોંધાયેલી હતી.
લોકોએ શું શીખવા જેવું છે?
આ કૌભાંડ ફરી એકવાર સાબિત કરે છે કે કોઈપણ એપ જે ટૂંકા સમયમાં વધુ પૈસા આપવાનો દાવો કરે, તેની પાછળ જોખમ હોય છે. પ્લે સ્ટોર પર વધુ ડાઉનલોડ્સ હોવા એ વિશ્વસનીયતાની ગેરંટી નથી. રોકાણ કરતા પહેલા SEBI કે RBI ની માન્યતા તપાસવી જરૂરી છે.
અમરેલી સાયબર પોલીસે નાગરિકોને અપીલ કરી છે કે જો કોઈ SD Pay માં ભોગ બન્યું હોય તો તાત્કાલિક 1930 હેલ્પલાઇન પર અથવા સ્થાનિક સાયબર સેલમાં ફરિયાદ નોંધાવે.
Sajjadali Nayani ✍
Friday World September 17,2026
#SDPayScam #AmreliCyberCrime #GujaratFraud #PonziScheme #CyberFraudAlert #634CroreScam #GujaratPolice #OnlineFraud #MLMScam #CyberSecurity
