-Friday World September 22,2026
પ્રતીકાત્મક તસવીર
અમદાવાદ: લગ્ન એ જીવનનો પવિત્ર બંધન છે, પણ આ બંધનને જ હથિયાર બનાવીને લોકોને લૂંટતી એક ખતરનાક ગેંગનો અમદાવાદ પોલીસે પર્દાફાશ કર્યો છે. છેલ્લા બે વર્ષમાં 6 જેટલા પુરુષો સાથે લગ્ન કરીને લાખો રૂપિયા પડાવનારી લૂંટેરી દુલ્હન અને તેની આખી ટોળકીને અસલાલી પોલીસે ફિલ્મી ઢબે ઝડપી પાડી છે.પોલીસને આ ગેંગને પકડવા માટે એક મહિના સુધી જહેમત ઉઠાવવી પડી હતી અને અંતે પોલીસ જાતે જ 'ડમી ગ્રાહક' એટલે કે નકલી વરરાજા બનીને છટકું ગોઠવવું પડ્યું હતું.
કોણ છે આ લૂંટેરી દુલ્હન?
પકડાયેલી મુખ્ય આરોપીનું નામ શારદા બાબુભાઈ ગામીત હોવાનું સામે આવ્યું છે. તેની સામે ગત 30 જાન્યુઆરીના રોજ અસલાલી પોલીસ સ્ટેશનમાં એક ભોગ બનનાર વ્યક્તિએ ફરિયાદ નોંધાવી હતી, જેના આધારે તપાસ શરૂ થઈ હતી.
તપાસમાં ખુલ્યું કે શારદા એકલી નથી, તેની સાથે 3 થી 4 લોકોની સંગઠિત ટોળકી કામ કરે છે. આ ટોળકીમાં ધોળકાની એક નૈનાબહેન નામની મહિલા અને વડોદરાના કેટલાક શખ્સો સામેલ છે. આ ગેંગનો ટાર્ગેટ ખાસ કરીને એવા બીજવર પુરુષો રહેતા હતા, જેમની પહેલી પત્નીનું અવસાન થયું હોય અને તેઓ એકલતાથી બીજા લગ્ન કરવા માંગતા હોય.
છેતરપિંડીની મોડસ ઓપરેન્ડી: આંસુ, બીમાર પિતા અને ફૂલહાર લગ્ન
આ ગેંગની છેતરવાની રીત ખૂબ જ ચાલાકીભરી હતી.
1. જાળ બિછાવવી: સૌ પ્રથમ તેઓ ધોળકાથી વડોદરા સુધી ભોગ બનનારને લઈ જતા. ત્યાં એક મહિલા દ્વારા પીડિતને છોકરી બતાવવામાં આવતી.
2. સહાનુભૂતિનું નાટક: બીજાનું જ ઘર બતાવીને એવું કહેવામાં આવતું કે, "આ છોકરીના પિતા ખૂબ બીમાર છે, ખાટલામાં છે." બીમાર પિતાના નામે સહાનુભૂતિ મેળવવામાં આવતી.
3. ફૂલહાર લગ્ન અને બહાના: ઉતાવળમાં માત્ર ફૂલહાર પહેરાવીને લગ્ન કરાવી દેવામાં આવતા. લગ્ન બાદ શારીરિક સંબંધથી બચવા માટે મહિલા વ્રત-ઉપવાસના બહાના કાઢતી હતી.
4. પૈસા લઈને ફરાર: લગ્નના નામે પિતાની સારવાર માટે 1.5 લાખથી 2 લાખ રૂપિયાની માંગણી કરવામાં આવતી. પૈસા મળતાની સાથે જ તક મળતાં જ દુલ્હન ઘરમાંથી રોકડ અને દાગીના લઈને ફરાર થઈ જતી હતી. દર વખતે તેઓ પોતાનું લોકેશન બદલી નાખતા જેથી પકડાય નહીં.
પોલીસ તપાસમાં સામે આવ્યું છે કે આ રીતે છેલ્લા બે વર્ષમાં તેઓ 5 થી 6 લોકોને પોતાનો શિકાર બનાવી ચૂક્યા છે.
પોલીસે કેવી રીતે ગોઠવ્યું છટકું?
ફરિયાદ બાદ આરોપીઓ સતત ફરાર હતા અને પોતાના ફોન બંધ કરી દીધા હતા. અસલાલી પોલીસની ટીમે એક મહિના સુધી ટેકનિકલ સર્વેલન્સ અને બાતમીદારોની મદદ લીધી. જ્યારે કોઈ રસ્તો ન રહ્યો ત્યારે પોલીસે પોતે જ બીજવર પુરુષ બનીને સંપર્ક કર્યો.
પોલીસના ડમી ગ્રાહકે ગેંગનો સંપર્ક કરતા જ તેઓ ફરી એ જ જૂની જાળમાં ફસાવા તૈયાર થઈ ગયા અને પૈસાની માંગણી કરી. સ્થળ નક્કી થતાં જ પોલીસે છાપો મારીને મુખ્ય દુલ્હન સહિત ગેંગના સભ્યોને ઝડપી પાડ્યા હતા.
હાલ પોલીસે તમામ આરોપીઓની ધરપકડ કરીને વધુ પૂછપરછ હાથ ધરી છે. આ ગેંગે બીજા કેટલા લોકોને છેતર્યા છે તેની તપાસ ચાલુ છે. પોલીસે લોકોને અપીલ કરી છે કે લગ્ન જેવા સંવેદનશીલ મામલે કોઈપણ અજાણ્યા વ્યક્તિ પર ભરોસો કરતા પહેલા સંપૂર્ણ તપાસ કરવી અને જો આવી કોઈ ગેંગનો ભોગ બન્યા હોવ તો તરત જ પોલીસનો સંપર્ક કરવો.
Sajjadali Nayani ✍
Friday World September 22,2026
#AhmedabadNews #LooteriDulhan #FakeMarriageGang #AhmedabadPolice #CrimeNews #GujaratCrime #MatrimonialFraud #AslaliPolice #DummyCustomerTrap #FraudAlert
