- Friday World September 22,2026
શું છે આખો મામલો?
છેલ્લા એક અઠવાડિયાથી ગુજરાતના અલગ-અલગ શહેરોના નામ સાથે સોશિયલ મીડિયા પર આવી પોસ્ટ જોવા મળી રહી છે. આ પોસ્ટમાં AI દ્વારા બનાવેલા આકર્ષક ફોટા, યુવક-યુવતીઓના પરંપરાગત ડ્રેસમાં ગરબા રમતા વીડિયો મૂકવામાં આવે છે.
તેમાં દાવો કરાય છે કે:
- 2 કલાક માટે: 2500 થી 3000 રૂપિયા
- આખા દિવસ માટે: 6000 થી 7000 રૂપિયા
- ગોલ્ડ, સિલ્વર અને પ્લેટિનમ પ્લાન: જેમાં ફોટોશૂટ, રીલ બનાવવી, ગરબા સ્ટેપ્સ શીખવાડવા જેવી ઓફરો આપવામાં આવે છે.
આ મોટાભાગના એકાઉન્ટ માં માત્ર થોડા હજાર ફોલોઅર્સ હોય છે અને તે વેરીફાઈડ હોતા નથી. પુરુષોને ટાર્ગેટ કરીને આવી જાહેરખબરો વધુ ફેલાવવામાં આવી રહી છે.
આ સ્કેમ કેવી રીતે કામ કરે છે? - નિષ્ણાતોની ચેતવણી
સાયબર સિક્યુરિટી નિષ્ણાતોનું માનવું છે કે આ અત્યાર સુધીનો સૌથી નવો હની-ટ્રેપ અને સેક્સટોર્શનનો પ્રકાર હોઈ શકે છે.
સુરતના જાણીતા સાયબર એક્સપર્ટ ચિંતન પાઠક જણાવે છે, "છેલ્લા 5 વર્ષમાં અમે આવા સેંકડો કેસ જોયા છે. શરૂઆતમાં સામેની વ્યક્તિ ખૂબ જ મીઠી વાતો કરશે. જો તમે પુરુષ છો તો મહિલાના અવાજમાં અને મહિલા છો તો પુરુષના અવાજમાં વાત કરવામાં આવશે. ત્યારબાદ તમારી પાસેથી ફોટા-વીડિયો માંગવામાં આવશે, વીડિયો કોલ કરવા માટે દબાણ કરાશે. એકવાર તમે ફસાયા પછી તમારા ફોટાનો ઉપયોગ કરીને AI થી ન્યુડ કન્ટેન્ટ બનાવીને તમને બ્લેકમેલ કરવામાં આવશે."
બીજો ખતરો એ છે કે ઘણીવાર તમને એક .apk ફાઇલ અથવા પેમેન્ટ લિંક મોકલવામાં આવે છે. તેના પર ક્લિક કરતાની સાથે જ તમારા ફોનનું સંપૂર્ણ નિયંત્રણ હેકર્સ પાસે જતું રહે છે અને તમારા બેંક એકાઉન્ટમાંથી પૈસા ઉપાડી લેવામાં આવે છે.
અમદાવાદ સાયબર ક્રાઇમ DCP નો વીડિયો સંદેશ
આ સમગ્ર મામલાની ગંભીરતાને જોતા અમદાવાદ સાયબર ક્રાઇમના DCP ડૉ. લવિના સિન્હાએ વીડિયો સંદેશ જાહેર કર્યો છે.
તેમણે સ્પષ્ટ કહ્યું છે કે, "સોશિયલ મીડિયા પર વાયરલ થઈ રહેલા આવા મેસેજ અમારા મોનિટરિંગ સેલના ધ્યાને આવ્યા છે. સામેની વ્યક્તિ કોણ છે તેની કોઈ ખાતરી નથી. આ એક સંગઠિત સ્કેમ હોઈ શકે છે. એકવાર ચેટિંગ શરૂ થયા પછી તેનો ગેરકાયદે ઉપયોગ થઈ શકે છે. પેમેન્ટ લિંક દ્વારા ડિજિટલ ફ્રોડ થઈ શકે છે. તેથી કોઈપણ લોભામણી જાહેરાતમાં લલચાશો નહીં."
તેમણે લોકોને અપીલ કરી છે કે જો આવી કોઈ લિંક પર ક્લિક થઈ ગયું હોય, પૈસા ગુમાવ્યા હોય કે ફોન હેક થયાની શંકા હોય તો તાત્કાલિક *1930* હેલ્પલાઇન નંબર પર કોલ કરો અથવા નજીકના પોલીસ સ્ટેશનમાં અને http://cybercrime.gov.in પર ફરિયાદ નોંધાવો.
સુરક્ષિત કેવી રીતે રહેવું?
1. અજાણ્યા એકાઉન્ટ પરથી આવતી આવી ઓફરો પર વિશ્વાસ ન કરો.
2. કોઈપણ અજાણી લિંક, QR કોડ કે .apk ફાઇલ ડાઉનલોડ કરશો નહીં.
3. અગાઉથી પૈસા ટ્રાન્સફર કરવાનું કહે તો તરત જ સાવધાન થઈ જાઓ.
4. તમારા સોશિયલ મીડિયાની પ્રાઈવસી સેટિંગ્સ મજબૂત રાખો.
નવરાત્રિ એ આસ્થા અને આનંદનો તહેવાર છે, તેને કોઈ સાયબર ગઠિયાનો શિકાર ન બનવા દો. સતર્ક રહો, સુરક્ષિત રહો અને ગરબાનો સાચો આનંદ માણો.
Sajjadali Nayani ✍
Friday World September 22,2026
#GarbaPartnerScam #NavratriScamAlert #GujaratPolice #CyberCrimeAlert #AhmedabadCyberCell #HoneyTrap #SextortionScam #Navratri2026 #OnlineFraud #StaySafeOnline
